MARI BOINE

 

Mari Boine lea okta dovdosamos sámi artisttain máilmmis. Son almmustahtii vuosttaš álbuma jo jagis 1985 ja almmustahttá ain ođđa musihka. Ođđasamos cd-skearru See the Woman almmuhuvvui jagis 2017.

 

Boine lea bálkkašuvvon máŋgii. Son lea ožžon earret eará Spellemann-bálkkašumi ja Davviriikkaid ráđi musihkkabálkkašumi (Nordic Council’s Music Award).

 

Mari Boine čuojahii Ijahis ijas jagis 2014 ja dán gease boahtá son fas Anárii musihkkajoavkkuinis. 

 

Guldal Mari Boine:

 

Spotify

YouTube

ISÁK

 

ISÁK lea Elle Marie Hætta Isaksena musihkkajoavku. Elle Marie bođii vuos dovddusin go vuittii Sámi Grand Prix 2017 ja seamma jagi Eurohpá vehádatgielaid lávlungilvvu Liet International. Dan maŋŋá vuittii son vel Stjernekamp -gilvvu Norggas mii lea NRK bivnnut tv-prográmma. 

 

ISÁK musihkas ovttastuvvet árbevirolaš luohti, urbána syntetisáhtorat ja lyrihkat main lea sihke sáme- ja eaŋgalasgiella. Joavku lea aiddo almmuhan vuosttaš álbuma Ealán.

 

Hætta Isaksen lassin musihkkajovkui gullet buvttadeaddji Daniel Eriksen (Alan Walker, The Wombats) ja rumbbuid čuojaheaddji Aleksander Kostopoulos (Mari Boine, Moddi, Adjagas, Pil & Bue). 

 

Guldal ISÁK:

 

Spotify

YouTube

SANČUARI

 

Sančuari lea legendáralaš sámi musihkkajoavku, man musihkas ovttastuvvet folk-rock ja luohti. Joavku vuođđuduvvui jo jagis 1984 ja dat lea okta boarrásamos ain aktiiva sámemusihkkajoavku. Dán jagi Sančuari ávvuda jo 35-jahkásaš karrieara ja lea almmustahttán dan gudnin álgojagis 2019 ođđa cd-skearru, Sarvvagalba.

 

Sančuari aitosaš lahtut leat Heaika Hætta (lávlu/juoigan, gitárra, keyboard) ja Svein Egil Oskal (lávlu/juoigan, keyboard), muhto sudnos lea mielde álot eará musihkkárat maiddái sihke cd-skearrus ja konsearttain. Sančuari vuittii Áillohaš-bálkkašumi jagis 2000.

 

Guldal Sančuari:

 

Spotify

YouTube

NIKO VALKEAPÄÄ

 

Niko Valkeapää lea guhká bargan ja riikkaidgaskasaččat dovddus sámeartista, gean lávlagiin vuhtto nannosit sámi árbevierru, muhto dat eai goittot leat árbevirolaš luođit. Su musihkas gullat váikkuhusaid dálá popmusihkas. Valkeapää lea dovddus sihke geasuheaddji musihkas ja maiddái áidnalunddot lávdekarismas.

 

Valkeapää lea vuoitán Sámi Grand Prix -gilvvu guktii, jagiin 1994 ja 1995 sihke maiddái Eurohpá vehádatgielaid Liet-lávlungilvvu jagis 2004, mas son válljejuvvui maiddái geahččiid favorihttan. Son lea ožžon dasa lassin Spellemann-bálkkašumi ja guokte álbmotmusihkkabálkkašumi Norggas. Valkeapää ođđasamos álbuma Gáldu almmustahttui giđđat 2019.

 

Valkeapää lea loaiddastan festiválain ja konsearttain nu Eurohpás go Brasilias ja gitta Jáhpanis. Ijahis ijas son lea čuojahan guktii ovdal, jagiin 2005 ja 2013.

 

Govva: Julia Marie Naglestad

 

Guldal Niko Valkeapää:

 

Spotify
YouTube

KATARINA BARRUK

 

(c) Helleday Arts. 

 

Katarina Barruk lea nuorra agistis fuolakeahttá jo stáđásmahttán iežas sajádaga iežaslágán artistan sámi musihkkamáilmmis. Barruk čállá ieš su lávlagiid ja vaikke su stiilla sáhtášii govvidit lagamusat atmosfearalaš pop-musihkkan, de earrána su musihkka mainstream-musihkas ii dušše improvisašuvdna- ja luohteelemeanttaid dihte, muhto maiddái hui áitatvuloš ubmisámegiela geažil. Barruk musihka fáttát leat earret eará ráhkisvuohta ja manaheapmi sihke dáistaleapmi giela beales.

 

Musihka lassin ubmisámegiela ovdanbuktin ja ealáskahttin leat Barrukii dehálaš áššit. Dán son lea árben, dasgo son boahtá hui musihkalaš ja ubmisámegielat bearrašis. Barruk lea ovttasbargan maiddái Frode Fjellheimain. Fjellheim lea earret eará heivehan ja buvttadan Barruk musihka. Son lea dál bargamin ođđa musihkain ja seamma áigge čuojahantuvrras musihkkajoavkkuinis miehtá Ruoŧa ja Norgga. Barruk lassin jovkui gullet Christo Stangess (bássa), Arnljot Nordvik (gitárra), Christer Jørgensen (perkušuvnnat), Øystein Myrvoll (keyboard) ja Nils Johansson (live sound).

 

Jagis 2012 Katarina Barrukii geigejuvvui jagi nuorra artistta bálkkašupmi Riddu Riđđu -festiválas. Jagis 2013 son oaččui maiddái jagi nuoraidbálkkašumi Ubmi Sámevahkuin, mat lágiduvvojit jahkásaččat. Barruk čuojaha dál vuosttaš háve Ijahis ijas ja Suomas.

 

Guldal Katarina Barruk:

 

Spotify

YouTube

HÁLIIDIVČČEN

 

Diktakonsearta Háliidivččen čatná geasuheaddji vugiin oktii divttaid, lávlagiid, luđiid ja musihka. Fárus leat Niko Valkeapää, Ánná Káisá Partapuoli, Øystein Nilsen ja Inger-Mari Aikio.

 

Slám-poehta Ánná Káisá Partapuoli lea 25-jahkásaš ja eret Sohpparis. Son lei diibmá Riddu Riđđu –festivála nuorra artistan ja oaččui Norgga Sámedikki kulturstipeandda. Slám-poesiija lea ođđa suorgi sámi kultureallimis.

 

Diktačálli Inger-Mari Aikio lea čállán logi girjji sámegillii, čieža dain leat diktagirjjit. Divttat leat jorgaluvvon olu gielaide, omd. spánskka-, eaŋgals-, bulgaria-, araba- ja swahiligillii. Son johtá maid viššalit máilmmi diktafestiválain divttaidisguin. Diktakonsearttas gullat erohtalaš divttaid su ođđasamos girjjis 69 čuoldda.

 

Lávlu Niko Valkeapää lea almmustahttán musihka lassin maid diktagirjji ”Lása duohken” moadde jagi dassá. Su ođđasamos skearru ”Gáldu” fas almmustuvai dán jagi álggus. Niko lea vuoitán máŋggaid lávlungilvvuid ja bálkkašumiid, ja johtán doallamin konsearttaid gitta Brasilia ja Jáhpana rájes. Son lea eret Eanodagas.

 

Juoigi ja šibitdoalli Øystein Nilsen lea čohkken olu várjjagaččaid árbevirolaš luđiid. Dasa lassin son lea čállán luđiide čilgehusaid, vai dán áigge olbmot dovdagohtet luđiid duogáža. Son bidjá maid ieš ođđa luđiid dološ vuogi mielde. Øystein orru Unjárggas.

ARTICLE 3

 

Article 3 lea Sámi áidna nissoniid DJ-joavku. Joavkkus leat mielde njealje sámenissona, geat leat dovdosat kultursuorggis – Christina Hætta, Elle Márjá Eira, Sunna Nousuniemi ja Anne Henriette Nilut. Namma Article 3 čujuha ON:id eamiálbmotrivttiid julggaštussii ja dan goalmmát artihkkalii, man mielde eamiálbmogiin lea iešmearridanriekti.

 

Article 3 okta guovddášjurdda leage dat, eamiálbmogiin lea iešmearridanriekti maiddái dánsunláhttis. Sii čuojahit sámemusihka ja eará eamiálbmogiid musihka. Leage gearggus dánsut!

ANNA MOROTTAJA

 

Guovža-Beahká Ánná, Anna Morottaja lea musihkkár ja luohte- ja livđečeahppi. Son bargá musihkkadáiddárin ja ealáskahttá anáraččaid vokálamusihkkaárbevieru, livđe. Ánná lea oahpahan livđe mánáide giellabesiin ja skuvllain ja maiddái rávesolbmuide bargobájiin.

 

Ánná almmustahttá Ijahis Ijas iežas debyhtaálbuma. Skearus son ovdánbuktá áhčis siesá, Anna Briitta Mattus arkiivabáttiid árbevirolaš livđiid, maid fáddán leat su fuolkkit ja eallit ja lottit. Lassin mielde leat livđet, maid son lea bidjan ieš.

 

AYDAR CHURUPOV

 

Dán jagi Ijahis ija eamiálbmotguossi lea Aydar Churupov. Son boahtá Ruossaš, Altai dásseválddis ja ovddasta telengit-álbmoga. Son lea musihkkár ja šuoŋadahkki, guhte máhttá maiddái árbevirolaš kai-čottalávluma.

 

Dasa lassin Churupov lea Altai álbmotčuojanasaid meašttir ja lea oassálastán Dološ musihka ja 500-400 oKr áigodagas leahkki skyhtaid hárppa ođđasishuksen -prošektii.

WIMME SAARI / Agálaš johtin -stohpokonsearta

 

Wimme Saari lea riikkaidgaskasaččat dovddus sámeartista, guhte lea loaiddastan jo 30 jagi áigge. Son lea hábmen iežaset juoiganteknihka, masa son lea ovttastahttán váikkuhusaid ambient-musihkas. Iežas karrieara áigge son lea ožžon máŋggaid dovddastusbálkkašumiid, dego Teosto-bálkkašumi ja jagi álbmotmusihkkár-bálkkašumi.

Sámi musea Siida ordne Wimme Saari Agálaš johtin -konseartta Siidda olgomuseas Itnetvári stobus lávvardaga 17.8.2019 dii. 14.
Konsearta lea oassin Ijahis idja -dáhpáhusa prográmma.

Bileahtaid vuovdin álgá Siiddas vahkus 33. Bileahta haddi lea 15,00€ ja daid mearri lea ráddjejuvvon.

 

Guldal Wimme:

 

Spotify

YouTube

MÁTTUT

 

Jávrrešduoddara luođit

 

Máttut-konsearttas Jávrrešduoddara luđiid juiget Anna-Reetta Niemelä, Matias Niemelä, Petra Biret Magga-Vars ja Anna Näkkäläjärvi-Länsman. Janne Lappalainen lea mielde čuojaheame giellainstrumeanttaid ja perkuššuvnnaid.

 

Konsearta ollašuhttojuvvui vuosttaš geardde Márjjábeivviin njukčamánus 2019. Konsearttas gullat Nuorta-Eanodaga luđiid sihke árbevirolaš ja ođđa hámis.