LUOĐIT

Jussen Ántte Sálmmo Ánná Máret, Anna Näkkäläjärvi-Länsman jyeigee puáris já uđđâ luohti Juvduujuv riddoteermi alne. Ánnáin jyeigee suu uárbimpeeli Guhtur Biera Jovnna Mauri Petra Biret – Petrabiret Magga-Vars. Oovtâst suái koččov oovdân jieijâs suuvâi enâduvâid, muštoid já ulmuid, pyehtiv taid taan ááigán juáigusijn. Tábáhtus lii uási Näkkäläjärvi-Länsman taiđâlii tuáhtártutkâmušâst Helsig taaiđâollâopâttuv Sibelius-Akatemiast.

Anna Näkkäläjärvi-Länsman, Jussen Ántte Sálmmo Ánná Máret, lii sämiartist já jyeigee, vuálgus Anarist. Sun lii šoddâm ellee sämisiärvusist, mast juoigâm lii lamaš tehálâš uási kulttuurist já argâpeeivist. Näkkäläjärvi-Länsman lii tobdos vuáimálâžžân lávlon, kii oovtâst ärbivuáválii juoigâm persovnlii já modern olgospyehtimân. Suu jienâ lii herkis já taaiđâlâš. Sun lii lávdástâm sehe soolon já sierâlágán juávhuin Suomâst já aalmugijkoskâsávt, meid artistnoomáin Ánnámáret. Tääl sun parga taaiđâlii tuáhtártutkâmuš Taaiđâollâopâttuv Sibelius-Akatemiast já totká juoigâm modern sämmilii identiteet já taaiđâlii olgospyehtim uássin. Suu pargo kuávdáást lii sämikulttuur eellimvuáimálâšvuođâ já jotkuuvâšvuođâ nanodem.

Jyeigee Petra-Biret Magga-Vars, Guhtur Biera Jovnna Mauri Petra lii vuálgus Vuáču kylást, mii lii sämmilij päikkikuávlu maadâuásist. Suu suuvâ madduuh ulâtteh liijká tavas, Iänuduv já Kuovdâkiäinu räi. Pärnivuođâstis Magga-Vars kuulâi juoigâm jieijâs sämisiärvusist já oopâi ärbivuáválijd juáigusijd jieijâs äijihist já jo jáámmám sämmilijn elilâmulmuin. Jyeigen sun lii lávdástâm vijđáht aalmugijkoskâsávt, eereeb iärrás Saksaast, Färsuolluin, Kanadast já Japanist. Sámi Grand Prix -kišto juoigâmuásán Magga-Vars lii väljejum uásálistiđ kuohtii. Tääl sun parga jieijâs juoigâmsooloalbum ooleest sehe sirdá juoigâmärbivyevi ovdâskulij jieijâs máttááttempargo peht, tolâmáin pargopáájáid já kuursâid.