Ijâttes ijjâ ocá artistijd Talent stagen!

Ijâttes ijjâ ocá artistijd já muusikjuávhuid Talent stagen. Talent stage kuávdáást láá uđđâ artisteh, kiäin tun jieh kenski lah vala kuullâm, mutâ vissásávt kuulah puátteevuođâst. Talent stage fáálá vuossâmuu tove lávdásteijee sämiartistáid já meid eenâb hárjánâm artistáid saje oovdânpyehtiđ jieijâs muusik já finniđ hárjánem láávdástmist. 

Taan ive Ijâttes ijjâ uárnee vuossâmuu tove ávus uuccâm Talent stage lávdásteijen. Lávdásteijen pyehtih uuccâđ puohahasiih sämmiliih já sämikielâliih artisteh já juávhuh sierâ genrein. Muusik puáhtá leđe ärbivuáválâš, moodeern teikâ tai siävuttâs. 

Talent stage uárnejuvvoo lávurduv porgemáánu 16. peeivi uássin Ijâttes ijjâ -festivaal ohjelm. Artisteh oovdânpyehtih jieijâs lávdástem ääigi suulân 1–2 pitá. Artisteh iä finnii jieijâs láávdástmist päälhi, mutâ faallâp sijjân oles oholoopâ festivaalpaasâ sehe lieggâ purrâmuš lávdástempeeivi. Lasseen máhđuliih mätkikoloh máksojeh almos fiävru kiävtust šaddee kuáhtulij koloi mield. 

Talent stage artisteh väljejuvvojeh Ijâttes iijâ uárnejeijei tooimâst tienuuvt, ete lávdásteijeevaljiittâs lii nuuvt maaŋgâpiälálâš ko máhđulâš. Uuccâmäigi Talent stage artistin nohá koskoho 16.7.2025. Teevdi ucâmuš Talent stage artistin taa. 

Artistijn lii lasseen máhđulâš adeliđ mietâmâš jieijâs ucâmuš kevttimist meid puáttee iivij Talent stage vuáváámist. Festivaal ij almostit puoh uuccâm artistij já juávhui noomâid peic tuš väljejum.  

Lasetiäđuh: 
Anni-Sofia Niittyvuopio 
anni-sofia.niittyvuopio(at)samediggi.fi 
+358 40 7082 072