KAJSA BALTO
Kajsa Balto lij sääʹm jiõnnân välddam sââʹjes teeimjaž iiʹjji Taarr musikk-ǩeeʹdd kõskksââʹjest. Son lij puättam oummi õuʹdde õhtteei da čâđđam paakkeei läullʼjen, koonn laaul lij siõlʼlaž da tiudd saaǥǥin.
Vuârr vuârast Kajsa čuäʹjat, što suʹst lij saakk, da son läull laullʼjees pottsânji da viõkksânji, loommi intensiteeʹttin. Bääʹndines son oudd miõʹllepâššneei, siõl kuõskteei konseʹrttjeäʹlstõõzzid, kookk kuõskte da kueʹđđe oummuid kaiʹbbjed lââʹzz.
Kajsa šõõddi Oslost taarr jieʹnn da sääʹm eeʹjj piârrjest– kulttuurtuâǥǥaž, kååʹtt lij ravvsânji vaaiktam suu čeäppõõzzlaž vuäinnmõʹšše. Son lij raajjâm jiiʹjjeslaaǥǥan musiikklaž maaiʹlm, koʹst son rääjj tâʹvvsääʹm juõiggäʹrbbvuõđ õõl genreraajid râstldeei musikkmaaiʹlm. Vueʹssmannu 17. peeiʹv 2024 son õlmstõõʹtti albuumâs Rájás, kååʹtt vuäǯǯai samai pueʹrr ärvstõõllmõõžžid da koonn õlmstõʹtteš čuäjtõõttmõõžžin symboolʼlânji miârkteei NRK meersažpeiʹvv-vuõlttõõzzâst. Eeʹjj 2024 vuõssmõs adveʹnttpâʹsspeeiʹv šõõddi še ǩeeʹrjtum pââjas kulttuurhistoriaaʹje, ǥu suʹst šõõddi vuõssmõs sääʹmartistt, kååʹtt uuʹdi jooulkonseeʹrt Oopperast õõutsââʹjest KORKin (Taarr radio sinfoniaorkester). Mââimõs iiʹjji son lij vuäǯǯam šiõǥǥ maacctõõzz nuʹtt dommjânnmeʹstes ǥu ålggjânnmi mieʹldd.
Snimldõk: Ørjan Marakatt Bertelsen
Puk artiist