Ijahis Idja čohkke borgemánus Sámeeatnama násteartisttaid Anárii

Ijahis Idja -eamiálbmogiid musihkkafestivála ávvudit Anáris 14.-15.8.2026. Festivála buktá Anárii viiddes fálaldaga sámemusihka násttiid. Vahkuloahpas leat musihka lassin maid njoarostangilvvut, duodjemárkanat, mánáide ja nuoraide oaivvilduvvon bargobájit sihke eará prográmma.

Bearjadaga lávddi ala lávkejit Suõmmkar, Wimme & Rinne, Jon Henrik Fjällgren sihke Mollet. Suõmmkar konsearttas almmustahttet seammás sin Peäccam da Paččjokk -álbuma. Vurdojuvvon Wimme & Rinne ovddit Ijahis ijas lea golihan juo áigebodda. Jon Henrik Fjällgren lea oahpes ja vurdojuvvon artista Anára doaluin ja Ijahis Idja oažžu gudni doaibmat loahpahanbáikin su borgemánu turneai Suomas. Bearjadateahkeda roavvásamos šuoŋain vástida Mollet, mii boahtá Ruoŧa beale Sámis. Joavku ii leat maŋimuš jagiid nu ollu beaggán. Joavkku muitet legendáralaš Ijahis idja -loaiddastemiin – dál sii máhccet lávddi ala olles leavttuin.

Lávvardateahketbeaivve álggaha Čuovvâd & Loiskis stoahkan- ja lávlunkonsearttain, mii lea oaivvilduvvon mánáide ja mánámielagiidda. Sajosa auditorias fas gullat Niillas Holmberga ja Pauli Lyytinen hearkkes musiserema. Soai leaba leamaš maid evttohassan Teosto-bálkkašumi oažžun. Sámemusihka ođđasamos biekkaid gullat Talent Stages, man artisttat almmustahttojit maŋŋelis. Juo árbevierrun šaddan njoarostangilvvut ordnejuvvojit álgoeahkeda, man maŋŋá eahket joatkašuvvá musihkain.

Luohti ja Livđe -konsearttas loaiddastit anárlaš Heli Aikio, vuohččulaš Milla Pulska ja kárášjohkalaš John Mathis Utsi. Máttasápmelaš Marja Mortensson lea beakkán hearkkes ja hypnohtalaš loaiddasteamistis ja fállá geahččiide ja guldaleaddjiide konseartavásáhusa, mii seailu agálaččat mielas. Mortenssona maŋŋá lávddi ala lávkeba Piera Eira ja Johan Ivvar Gaup, oahppásut namain EiGa. Artistta guovttos leaba badjánan stuorra álbmoga diđolašvuhtii dan maŋŋá, go Eira vuittii jagi 2025 Sámi Grand Prix bihtáinis dálkkiid čađa. Festivála loahppakonsearttas vástideaba Amoc ja Ailu Valle, geat oaččuiga dán jagi Áillohaš-bálkkašumi.

Lassin festiválabirrasis lea oppa vahkuloahpa Yleisradio Yle 100-busse, mii lea dán geasi johtán birra Suoma, sihke Anára nuoraiddoaibma ovttas Sámedikki Nuoraidráđiin ja De2-projeavttain. Restoráŋŋabálvalusas vástida sihke olgun ja siste restoráŋŋa Čaiju. Festivála álgá duorastateahkeda ovdafeasttain, mii lágiduvvo ovttas Wilderness Hotel Juutuain. Lávddi ala lávke dalle Sunna Utsi, gean musihkas ovttastuvvet folk-pop, modeardna pop-inspirašuvnnat sihke eallinvásáhusaide, identitehttii ja moriheapmái vuođđuduvvi rehalaš ja hearkkes máinnasmuitaleapmi.

Ijahis Ija lágidit Anára Sámisearvi rs, Sámediggi, Sámekulturguovddáš Sajos, Sámi oahpahusguovddáš sihke Sámemusea ja luondduguovddáš Siida. Festivála ovttasbargoguoibmin lea Wilderness Hotel Juutua.

Lassediehtu:

Minna Lehtola

Buvttadeaddji, Ijahis Idja -festivála

Tel. 044 902 9295

minna.lehtola(at)samediggi.fi