Jon Henrik Fjällgren Ijâttes ijjâ -festivaalân

Ijâttes ijjâ -algâaalmugij muusikfestivaal uárnejuvvoo 14.8.2021. Festivaal lii taan ive oovtpiäivásâš.

Jon Henrik Fjällgren festivaal täsnin

Jon Henrik Fjällgren lii ohtâ festivaal válduartistijn. Fjällgren šoodâi tobdosin ko sun vuoitij Ruotâ Talang-kišto (eŋg. Got Talent) ive 2014. Ton maŋa sun lii meid uásálistám kulmii Melodifestivalen-kiišton ađai Ruotâ euroviisuraađhâkiišton. Tobbeen sun lii puáttám nubben, kuálmádin já niäljádin. Fjällgren lii almostittâm kulmâ album. Uđđâsumos single ”Hold my head up high” almostui njuhčâmáánust 2021. Muusik ooleest Fjällgren vuoitij ive 2018 Ruotâ Let’s dance -kišto, mii västid Suomâ Tanssi tähtien kanssa -kišto. Jon Henrik Fjällgren lii lamaš Ijâttes ijjâ -festivaal artistin ohtii ovdil-uv ive 2015.

Festivaal olášuttemvyehi vala ávus

Festivaaluárnejeijei vuossâmuš muulsâiähtu lii orniđ aalmugtábáhtus Anarist 14.8. Siämmáá ääigi vuávájuvvojeh muulsâiävtuliih olášuttemvyevih tego virtuaalfestivaal. Festivaal tieđeet ornimvyevist algâkeesi.

Ijâttes iijâ uárnejeh oovtâstpargoost Anára Sámisearvi rs, Sämitigge, Säämi kulttuurkuávdáš Sajos, Kähviviäsu Čaiju, Säämi máttááttâskuávdáš, Säämimuseo Siida já Yle Sápmi.

Lasetiäđuh:
Pyevtitteijee
Oula Guttorm
oula.guttorm(at)samediggi.fi
+358 40 667 4545