Ijahis idja -festivála prográmma lea almmustahtton

Ijahis idja -eamiálbmogiid musihkkafestivála prográmma lea almmustahtton otne. Festivála ordnejuvvo borgemánus Anáris jo ovccenuppelogát geardde. Festiválavahkkolohppii gullet konsearttaid lassin fanasmátki, duodjemárkanat, njoarostangilvvut, taleantalávdi sihke mánáid ja nuoraid prográmma.

Dáhpáhus álgá bearjadaga 19.8. mánáid- ja nuoraidprográmmain. Beaivvi áigge ovddalgihtii almmuhan mánát ja nuorat oassálastet bargobájiide ja besset geahččat sámi filmmaid. Sii besset maiddái čájehit iežaset dáidduid Násttážat-konsearttas.

Festivála rahppojuvvo bearjadaga dii 18.00, muhto jo ovdal dien, dii 17.00 lea vejolaš vuolgit Ijahis ija fanasmátkái Anarjávrái. Mátkki lágida Visit Inari ja mátkkis čuojaha Ailu Valle. Mátkái vuvdet sierra bileahtaid.

Bearjadaga konsearttaid Ijahis ija festiválaguovllus álggaha aiddo ođđa cd-skearru almmuhan Emil Kárlsen. Čuovvovažžan lea vuorus okta dálá bivnnuhamos sámeartistain, ISÁK. Bearjadaga konsearttat nohket sihkkarit garra leavttuin go lávdái njuiket Bernt Mikkel Haglund ja juoigit.

Lávvardaga 20.8. festivála rahpasa dii 15.00. Vuosttas konsearta lea Taleantalávdi, mas lávddi ala besset artisttat, geat eai vel leat leamašan olu oidnosis.

Ijahis ija lávddis loaiddasta lávvardaga maiddái Evvan nõmmpeeiʼv (Evvan namabeaivvit), mii lea áivve ođđa nuortalaš musihkáriid joavku, man vuosttas konsearta lea jagi 2022 Ijahis idja -festiválas. Árbevirolaš sámemusihka Ijahis ija lávdái buktet fas Ulla Pirttijärvi-Länsman, Semmen Bolshunov ja Petter Morottaja. Konsearttaid olis festiválaguossit besset njoarostit. Dárkilvuođa gáibideaddji gilvu lágiduvvo Sajosa šiljus. Lávvardaga konsearttat nohket garra trioi, go lávdái bohtet maŋŋálagaid Arvvas, Angelit ja Intrigue.

Jagi 2022 Ijahis ija plakáhta lea hábmen njuorggánlaš dáiddar Lada Suomenrinne.

Ijahis idja 19.–20.8.2019 Anáris. Bileahtaid ovddalgihtii vuovdin álgá vahkkus 28.  

Ijahis ija ordnejit Anára Sámisearvi ry, Sámediggi, Sámekulturguovddaš Sajos, Sámi oahpahusguovddáš, Anár gielda ja Yle Sápmi. Festivála ovttasbargoguoimmit leat Visit Inari ja Hotel Kultahovi.

Lassedieđut:
Buvttadeaddji
Oula Guttorm
oula.guttorm(át)samediggi.fi
+358 40 667 4545

Veahkkebuvttadeaddji
Aleksi Ahlakorpi
aleksi.ahlakorpi(át)samediggi.fi
+358 40 192 8468