Suõmmkar

Suõmmkar lij bäʹndd, kååʹtt õhttad vuäʹmes, nuõrttsäʹmmlai äʹrbbvuõttmusiikk (leeuʹd, kaʹdrel) ânnʼjõžpoddsaž maaiʹlm-musiʹǩǩe folk- da pop-vaaiktõõzzin. Bääʹndest läulla da leuʹddje Anna Lumikivi-Lemmetty da Hanna-Maaria Kiprianoff. Suõmmkrest liâ soiʹttjeeʹjen Marko, Pessi da Uula Jouste di Elias Nieminen lââʹssen.

Suõmmkar alttii čuäjtõõttmõõžžâs eeʹjjest 2016. Bäʹndd lij õlmstâttam debyyttalbumâs “Suõmmkar” påʹrǧǧmannust 2018 Ijahis idja -festivaalin Aanrest da tän eeʹjjest piâssâp âʹpet naaudšed bääʹnd bliinõõlmtõskonseeʹrtest.

Suõmmkar õlmstâtt ođđ Peäccam da Paččjokk- albuumâs, koon materiaal čiŋlmââvv Peäccam da Paččjooǥǥ siidi musikkäʹrbbvuõʹtte da nääiʹt teâđast Anna da Hanna-Maaria preddnid. Ođđ albuum âânn seʹst taʹnssjemlaullʼjid ǥu leeuʹdid čuõjldâttmõõžžin da krååʹma tõn, di teâđast modeernjab laullʼjid, kook vuäǯǯa inspiraatios preddnin da äʹrbbvuõđâst.